Кабар жана жарыялар

"Жаш котормочулар балдарга" аттуу иш чара

"Жаш котормочулар балдарга" аттуу иш чара

2017-жылдын 28-ноябрында “Ыйман, адеп жана маданият жылына” карата Кыргыз-Түрк "Манас" университетинин гуманитардык факультетине караштуу синхрондук котормо бөлүмү тарабынан "Жаш котормочулар балдарга" аттуу иш-чара болуп өттү.

Иш-чаранын максаты университеттеги окутуучулар менен студенттердин жасаган иштерин коомчулукка тартуулоо, университет менен мектепке чейинки уюм-мекемелердин, орто мектептердин байланышын чыңдоо, билим берүү, тарбиялоо иштери боюнча кызматташууга чакыруу.

Ага университеттин ректору, профессор Себахаттин Балжы, проректор, профессор Анварбек Мокеев, Бишкек шаарындагы мектепке чейинки билим берүү мекемелеринин жана орто мектептердин кыргыз тили жана адабияты мугалимдери, Кыргыз Билим берүү министирлигинин өкүлдөрү, КР Президентине караштуу Мамлекеттик тил боюнча улуттук комиссиясынын өкүлдөрү, китептерди редакциялап, басмага сунуштаган Кыргыз Жазуучулар союзунун Котормо жана Балдар адабияты бөлүмдөрүнүн жетекчилери, чыгармалары түрк тилине которулган балдар жазуучусу, КРнын Эл акыны Токтосун Самудинов, балдар жазуучусу Жылдыз Акаева, КР улуттук жазуучулар союзунун котормо секторунун жетекчиси Мукан Асаналиев, окуу жайдын окутуучу курамы жана студенттер катышты.

Котормочуларга арналган саамалыктын ачылышында гуманитардык факультетинин деканынын орун басары, профессор Жээнбек Алымбаев: "Синхрондук котормо бөлүмүнүн мааниси жана бул бөлүмгө болгон талап барган сайын өсүп жатат. Биз дагы бөлүмгө факультет катары керектүү иштерди жүргүзүүдөбүз жана студенттерибиздин сапаттуу билимге ээ болуусуна, окуу жайды аяктаган соң кесиптерин мыкты деңгээлде алып кетүүсү үчүн болгон аракетибизди жумшап жатабыз", -деди.

Андан кийин синхрондук котормо бөлүмүнүн башчысы профессор, доктор Жейхун Ведат Уйгур: "Биздин бөлүм түзүлгөн күнүнөн баштап бүгүнкү күнгө чейин улам өнүгүп отуруп, сапаттуу билимдин, эмгектин, биргелешкен долбоорлордун жана илимий эмгектердин борборуна айланды. Бөлүмүбүздүн окутуучулары студенттерге мыкты билим берүү үчүн, активдүүлүккө үйрөтүү, коомчулукка пайдалуу студенттерди тарбиялап чыгаруу үчүн күн-түн дебей иштеп келишет. Студенттерибиз дагы мугалимдеринен алган билим, тажрыйбаларын Кыргызстан менен Түркиянын белгилүү ишканалары менен бөлүшүп, мындан дагы өсүп өнүгүү үчүн бардык мүмкүнчүлүктөрдү колдонууга умутулушат. Бул жаатта ТРТнин кыргыз медиасынын өкүлдөрү үчүн уюштурган илимий семинарда бөлүмдүн студенттери Айдай Чоробаева менен Аман Чоробаевге мыкты котормочулук кызматтары үчүн уюм тарабынан ыраазычылык баракчасын ыйгаруу сунушу келип түшкөн", -деп студенттерге ийгилик каалады.

Куттуктоо сөздөрүнөн кийин котормо бөлүмүнүн ага окутуучусу Калия Кулалиева баяндама жасады. Андан кийин анын жаш балдарга арналган "Түштөр дүйнөсүндө", "Бир кызыктай доктур", "Акылдуу бала", "Чымчык жана көпөлөк" аттуу китептердин бет ачаары болду. Кыргыз жана түрк тилине которулган китептердин ичинде университеттин студенттеринин да мыкты деп табылган котормолору жарыяланган. Ошондой эле ага окутуучу Калия Кулалиеванын демилгеси менен өткөрүлүп жаткан иш-чаранын алдында котормо бөлүмүнүн окутуучуларынын да китептери жана котормолору сунушталып сатыкка коюлду.

Кечиненин ардактуу коноктору болгон, чыгармалары түрк тилине которулган балдар жазуучусу, КРнын Эл акыны Токтосун Самудинов, балдар жазуучусу Жылдыз Акаева жана КРнын улуттук жазуучулар союзунун котормо секторунун жетекчиси Мукан Асаналиев “Манас” университети эки өлкөнүн достугун бекемдеген алтын көпүрө экендигин белгилеп, КТМУнун студенттери котормочулук кесибинин Кыргызстанда керектүү экендигин көрсөтүштү деп, студенттерге каалоо-тилектерин айтышты.

Салтанаттын жүрүшүндө «Мыкты котормочу – 2017» конкурсунун жыйынтыгы чыгарылып, жеңүүчүлөргө сыйлыктар тапшырылды. Сынакта биринчи орунга Сезим Сатыбалдиева, Эржан Байкулов экинчи, ал эми Динара Бексултанова үчүнчү орунга татыктуу болушту. Мындан ары аталган сынак жыл сайын өткөрүлмөй болду.

Иш-чара концерттик программа менен жыйынтыкталды.

Медиа Манас

Haberin Tamamı: http://mediamanas.kg/2243-en-yi-evirmenlere-dlleri-verildi.html